Online news maintained by Arn Antonette D. Carollo. We will publish your news for free just email it to misoccnews@gmail.com Call or Text +63908 - 206 - 0158               +63908 - 206 - 0158                    +63908 - 206 - 0158      

Sunday, June 20, 2010

Bus ug motor single nagsungag, driver sa motor gupok ang tiil


NASULOD sa tambalanan ang usa ka lumilihok sa Rolando Lending Corporation sa Oroquieta City human kini madasmagi sa usa ka Rural Transit Bus nga nagbiyahe gikan sa Cagayan de Oror City padulong sa Dipolog City.

Giila sa kapolisan sa Plaridel, Misamis Occidental ang biktima nga si Jerolyn Salvaleon, 53 anyos ang pangidaron ug lumolopyo sa Oroquieta City.

Gipadayag ni Police inspector Roger Orias Albacete, chief of police sa maong lungsod nga sa pagdangat sa Rural Transit Bus nga nagdala sa body number 8570 sa Looc proper, Plaridel, Misamis Occidental sa unahan sa Lubog Bridge gikasugat niini ang biktima nga nagmaneho sa motor single.

Ang nagmaneho sa Bus mao si Ruperto Mahuloy, 47 anyos ang pangidaron ug nagpuyo sa Tagoloan, Cagayan de Oro City.

Nasayran nga mokapin sa 20 ka mga pasahero ang sakay sa maong bus.

Tinguha nga likayan sa Bus ang motor single nga gikasugat sa likoong bahin sa maong dapit apan naigo kini hinungdan nga nalagpot ang motor nga maayong pagkaguba.

Samtang nagubok usab ang bitiis sa driver sa motor single.

Ang bus nahagbong sa daplin sa dalan sa walang bahin ug gisungag usab niini ang pipila ka punoan sa lubi. Hinuon walay gikatahong nasamad sa mga pasahero.

Dali nga gikarga ang biktima sa laing bus nga padulong sa Oroquieta City apan gigukod kini sa usa ka ambulansiya sa Plaridel ug paghidangat niini sa Mansabay, Lopez Jaena, Misamis Occidental naapsan kini hinungdan nga gikarga kini sa ambulansiya.

Sa pagkutlo niining taho ang biktima gibalhin usab sa Mayor Hilarion A. Ramiro Jr., Memorial Regional Training and Teaching Hospital (MHARS-RTTH).

Mibalibad ang driver sa dihang tinguha nga hinabion sa Misamis Occidental News Team.

Enrollment sa ACE posible nga moubos sa 10 porsiento?

NANAWAGAN ang Archdiocesan Commission on Education (ACE) ngadto sa mga ginikanan ilabina niadtong mga matuohong Katoliko nga mopa-enroll sa ilang mga anak sa mga tunghaan nga nailalom sa ACE Catholic Schools.

Gipadayag ni Carmelito Heray, corporate secretary sa ACE ug principal sa Holy Child High School sa lungsod sa Clarin, Misamis Occidental nga padayon sila nga gaawhag sa mga matuohong Katoliko nga mopaeskuyla sa ilang mga anak sa mga Katolikong tunghaan sa lalawigan.

Saysay niini nga labing maayo nga makatungha sa ACE schools tungod kay aduna silay pinasahi nga mga programa nga gitutokan.

“Sa mga ACE schools man gud dili lang academics ang atong gitutukan niini ang value formation sa usa ka bata,” saysay ni Heray.

Sa tibuok lalawigan sa Misamis Occidental adunay 13 ka mga pribadong eskuylahan nga sakop sa ACE ug laing duha ka mga affiliate schools.

Giangkon usab ni Heray nga gumikan sa nasinating krisis namatikdan nga miubos ang enrollment sa School year 2010-2011 itandi niadtong imaging tingtungha.

Nagsugod ang enrollment sa mga ACE schools niadtong May 17 ug hanngtud pa sa ikaduhang semana sa Hunyo.

Hinuon naglaom si Heray nga mosaka pa ang enrollment gumikan kay padayon pa usab sila nga nagdawat og mga tinun-an.

Saysay niini nga kon ugaling motaas ang ilang enrollment posible nga 10 prosiento ra usab ang isaka apan kon moubos moabot gihapon sa 10 porsiento subay sa ilang kasinatian.

Giangkon usab niini nga mipataas sila karon sa ilang tuition fee sa 9 porsiento. Ang ilang tuition fee moabot sa P5,300 ang usa ka tuig.

Ang maong tuition itandi sa mga public schools mahal ra kini apan ang mga eskuylahan ilalom sa ACE mao usab ang labing barato sa tanan nga mga private schools.

Dingal nanawagan sa pagpananom og kahoy

PADAYON nga nanawagan ang hut-ong sa Society Advocates for Ecology and Sustainability sa pagpananom og kahoy ilabina nga nasitani ang taas nga higayon sa ting-init.

Ang Society Advocates for Ecology and Sustainability usa ka non-governmental organization nga nakatutuok sa pagpalambo ug pagpanalipod sa kinaiyahan.

Gipadayag ni forester Rolando Dingal lumilihok sa maong kahugpungan nga labing gikinahanglan ang pagpananom og kahoy ilabina nga taas taas na nga panahon nga nasinati ang kaainit sa lalawigan sa Misamis Occidental.

Saysay ni Dingal nga mating-init man o dili labing maayo nga mananom og kahoy ilabina nga dako kini og ikatabang n aron mapreserba ang kinaiyahan.

Kahinumduman nga sa wala pa ang piniliay unang nanawagan si Dingal sa mga botante nga botaran ang mga kandidato nga adunay palataporma nga nagtumong sa pagpanalipod sa kinaiyahan.

Migawas ang maong panawagan ni Dingal gumikan sa namatikdan nga aduna nay mga suba sa lalawigan sa Misamis Occidental nga nahubsan na tungod sa padayon nga pagpamutol og kahoy. Partikular nga gitumbok ni Dingal ang suba nga nahimutang sa bukid sa Tangub City nga naughan human nga masinati ang pagpamutol sa mga kahoy.

Nasayran usab nga ang Labo river sa Ozamiz kusog ang bul-og sa tubig apan gumikan sa pagpamutol sa kahoy sa ibabaw nga bahin niini mikibra ang tubig sa suba.

Tungod niini bisan pa man nga retirado na si Dingal gikan sa iyang pagtrabaho sa Department of Environment and Natural Resources (DENR) apan iyang gipadayon ang iyang kawsa.

Malaumon usab si Dingal ngadto sa mga midaog nga mga kandidato nga himuong kabahin sa ilang panerbisyo ang paghatag og pagtagad sa kinaiyahan. (NEPTALIE BATOLENIO)

Nova: Kon dili si Leo motabang adto ko ni Jeorge

POSIBLE nga sa kongresista sa unang distrito sa lalawigan sa Misamis Occidental si Ozamiz City mayor-elect Nova Princess Parojinog-Echavez moduol kon ugaling nga magdumili si 2nd District congressman-elect Loreto Leo Ocampos nga motabang kaniya sa mga proyekto alang sa Ozamiz.

Gipadayag ni Echavez nga kon ugaling dili malimtan ni Ocampos ang bangi sa politika dako ang posibilidad nga dili mohatag og ayuda kaniya ang napili nga kongresista sa ikaduhang distrito sa lalawigan.

Kahinumduman nga unang gipadayag ni Ocampos nga ang mga proyekto nga iyang ibubo sa Ozamiz dili kini moagi sa mga opisyal apan iya kining idiretso ngadto sa katawhan.
“Ang proyekto nato sa Ozamiz diretso sa tawo mao nga dili mabalaka ang katawhan tungod kay aduna kita daghang mga proyekto dinha,” saysay ni Ocampos.

Gumikan niini gisabot nga dili moagi si Ocampos sa napili nga opisyal sa Ozamiz gani mipadayag pa kini nga si Echavez mahimong mayor sa Ozamiz sulod sa mubo nga higayon.

Hinuon, gipasalig sa outgoing governor nga dili mahigawad ang mga Ozamiznon sa unsa man nga mga proyekto nga gikan kaniya.

Sa iyang kabahin, gisaysay ni Echavez nga kon dili gayud mahimo nga motabang si Ocampos adto na lang siya ni 1st District congressman-elect Jorge Almonte, nga parehas niya og partido ang Lakas-Kampi-CMD.

Apan wala gihapon magpakawala sa paglaum si Echavez nga unsa man ang mga bangi sa politika nga mahilot ra nila kini ni Ocampos ilabina nga nakasentro niini ang ilang panerbisyo ngadto sa katawhan.

Hinuon, managsamang nanawagan ang duha ka mga opisyal og reconciliation apan hangtud karon wala pa magkasulti ang duruha sa personal.(NEPTALIE BATOLENIO)

Group director sa polis dili pasudlon sa Ozamiz

BISAN pa man nga wala pa hingpit nga makalingkod ang bag-ong mayor sa Ozamiz City apan mipadayag na kini nga aduna siyay opisyal sa polis nga dili niya gusto nga madistino pagbalik sa Ozamiz City.

Gipadayag ni incoming mayor Nova Princess Parojinog-Echavez nga dili niya gusto nga ma-assign sa Ozamiz City ang kanhi group director sa 1005th Provincial Mobile Group (PMG) nga si Superintendent Edgar Daniel sa katarungan nga dili balance si Daniel nga motagad sa mga Parojinog.

Si Daniel giilisan kini sa pagka-group director sa 1005th atol sa election period ug gidungog nga posible nga ibalik human sa piniliay.
Gipadayag ni Echavez nga usa ka politiko nga iyang kaalyado ang giingong nangayo og pakitabang ngadto ni Daniel apan miprangka ang maong opisyal sa polis nga dili sila ‘kauban’. Gisabot kini nga adunay gidapigan ang polis.

“I don’t like him,” tuaw ni Echavez.

Dili gusto ni Echavez nga mabalik si Daniel sa Ozamiz tungod kay dili kini patas ug aduna kini gidapigan. Hinuon wala ibutyag sa incoming mayor kinsa ang gidapigan sa maong opisyal.

Saysay ni Echavez nga dili siya gusto nga butangan og polis ang Ozamiz nga adunay gidapigan kon dili kadtong polis nga alang sa tanan.

“Kanang polis gyud nga alang sa tanan, dili pud nang polis ni Parojinog,” dugang ni Echavez.

Saysay ni Echavez nga kon ugaling mabutang si Daniel pagbalik sa Ozamiz posible nga mohimo siya og lakang nga ideklara si Daniel nga persona non grata.
Gipaningkamutan sa PNN nga makuhaan sa iyang pahayag si Daniel apan dili kini makontak sa iyang telepono.

Driver natusaktusak sa bala

NATUSAKTUSAK sa mga bala sa wala pa masuta nga kalibre sa armas ang biktima sa pagpamusil kaniadtong miaging gabii Hunyo 2.

Ang biktima dali nga gidala sa Mayor Hilarion A. Ramiro Regional Training And Teaching Hospital(MHARRTTH)aron patambalan.

Sumala pa sa police spot report nila ni SPO3 Jerry Llamas,SPO1 Ronald Rosal ug PO1 Amerkhan naila ang biktima nga si Lemuel Mena 29,usa ka motorcab driver nagpuyo sa Purok 5,Brgy.Gango,Ozamiz City.

Sibo sa taho, ang biktima kauban sa iyang asawa niadtong higayuna gikan sa centro nga bahin sa dakbayan ug mipadulong pauli sa ilang panimalay sa barangay Gango,subay sa highway sa Brgy.Maningcol sa may 9:45 sa kagabhion, ang kalit lang nga gibabagan sa duha ka wala mailhi nga mga suspetsado sakay sa usa ka motor single sa pagtungod gayod nila sa Medina College, Maningcol highway.

Dungan usab niini ang pagpabuto sa suspetsado saw ala matino nga kalibre sa armas tumong sa biktima sa makadaghang higayon.

Ang biktima natusaktusak sa mga bala sa nagkadaiyang parte sa iyang lawas,usa sa tuong bahin sa iyang tiyan,duha sa tuo ug walang bahin sa iyang dughan ug usa didto mo tama sa iyang tuo nga bitiis.

Ang mga suspetsado sa pagpamanhig matud pa sa mga nakasaksi misutoy pagpadagan sakay sa ilang motor single padulong sa norte nga bahin sa dakbayan human sa hitabo.

Ang nasangpit nga biktima dali nga gidala sa mga bystander ngadto sa tambalanan aron patambalan apan hikabsan kini sa kinabuhi.

Wala pa gibutyag sa mga investigador kun unsa ang nakita nga motibo sa pagpamusil.Ang kaso sa pagkakaron gisangat sa police Intel operations division alang sa dugang imbestigasyon.(BERNALD TECSON)