MOELCI-II mibayad na og P3M sa Ozamiz

HINGPIT na nga mibayad ang Misamis Occidental Electric II Cooperative Incorporated (MOELCI-II) sa ilang gisaad nga P3 M ngadto sa Local Government Unit (LGU) isip kabahin sa ilang gikasabutan aron nga dili ihinayon ang pag-padlock sa ilanng buhatan.

Sa nakuha nga kasayuran sa Ozamiz City Treasurers Office, nakumpirma nga gituman ni MOELCI-II general manager Jemilou Pelimer ang iyang gisaad atol sa gipahigayon nga joint press conference.

Ang P3 M nga gibayad ni Pelimer mao ang ilang obligasyon sa gobiyerno nga real property tax ug franchise tax.

Nasayran nga ang MOELCI-II adunay balayronon nga P1,622,652.52 sa real property tax ug P7,101,311.98 alang sa franchise tax.

Nasayran nga ang gipanilngan ang MOELCI-II og franchise tax tungod kay wala kini moparehistro isip kooperatiba ilalom sa Cooperative Development Authority (CDA) sibo sa gilated sa Republic Act 6938.

Sibo sa saad ni Pelimer lakip sa ilang giproseso ang paglukat og business permit , occupancy permit ug building permit.

Nasayran nga sukad nga natukod ang buhatan sa sugang dagitabnon nga MOELCI-II niadtong 1976 wala kini gi-require sa LGU og business permit.

Kahinumduman nga wala mahinayon ang pagpadlock sa buhatan sa MOELCI niadtong Agosto 18, tangkod nga ika-15 ka adlaw sa pagpadala og demand letter sa LGU ngadto sa MOLECI-II apan human nga nagksabot.

Nag-ugat ang bangi sa LGU ug MOELCI-II human nga gipamutlan sa nahauna ang mga streetlights sa sentrong bahin sa siyudad.

Sa iyang kabahin, gipadayag ni Jonathan Rubio, City Administrator nga ang gihimo nga lakang sa LGU dili ingon nga mibalos apan igo lamang niini gipatuman ang nahasubay ug nalatid sa balaod.(NEPTALIE BATOLENIO)

Taskforce ania na sa MisOc

OPISYAL na nga midangat sa lalawigan sa M isamis Occidental partikular sa Ozamiz City ang Taskforce nga gitahasan sa pagbungkag sa Partisan Armed Groups (PAGs).

Gikompirma ni Misamis Occidental 2nd District representative Loreto Leo Ocampos nga aduna nay inisyal nga puwersa sa nga midangat sa lalawigan ilabina sa Ozamiz City.

Gipadayag ni Ocampos nga midangat na sa Ozamiz City si senior Superintendent Catalino Rodriguez, ang taskforce commander nga nadistino sa Misamis Occidental.

Nasayran nga si Rodriguez kanhi PNP regional director sa Northern Luzon.

Gidugang ni Ocampos nga gawas sa inisyal nga tropa nga nahiluna na sa lalawigan umaabot usab ang laing kompanya sa mga awtoridad nga kabahin sa taskforce nga nadistino sa lalawigan sa Misamis Occidental.

Gisaysay niini nga giaprobahan na ni Department of Interior and Local Government (DILG) secretary Jesse Robredo ang deployment sa usa ka company sa Special Action Force (SAF) nga madistino sa lalawigan sa Misamis Occidental.

Dako ang pagtuo ni Ocampos nga ipahiluna sa Ozamiz City ang taskforce, ilabina una na nga gitumbok niini nga ang dakbayan adunay PAGs nga naglihok nga sa kaulahian iyan gitumbok nga mao ang Kuratong Baleleng.

Pasabot sa kongresista nga ang pagpahiluna sa taskforce sa Ozamiz kabahin sa pagtabang sa chief executive sa Ozamiz.

“Ang pagbutang sa taskforce is to help the mayor, the people of Ozamiz City ilabina ang katawhan sa Misamis Occidental,” padayag ni Ocampos.

Gipunting ni Ocampos nga ang mahadlok sa taskforce kadtong mga tawo nga adunay illegal nga kalihukan.

Kahinumduman nga una na nga gipadayag ni Ozamiz City mayor Nova Princess Parojinog-Echavez nga iyang gidawat ang pagdangat sa taskforce sa Ozamiz City.

Saysay niini nga ang iyang pagdawat tungod sa iyang pagtuo nga dako kini og ikatabang sa peace and order situation sa Ozamiz City, ilabina nga nakasinati ang dakbayan sa kakulang sa ginsakupan sa kapolisan.

Gidayeg usab ni Ocampos ang reaksiyon ni Echavez nga pagdawat sa taskforce, dungan sa paghinaot nga seryoso kini sa maong lakang.(NEPTALIE BATOLENIO)

Torismo sa MisOc apektado sa isyu sa PAGs

BISAN ang natad sa torismo saMisamis Occidental natay-og sa balita nga ang lalawigan nalakip sa mga dapit nga adunay partisan armed groups (PAGs) sama sa Abra ug Masbate.

Gipadayag ni Gerald Ramiro, provincial tourism council chairman sa Misamis Occidental nga gumikan sa gipdayag ni Misamis Occidental 2nd District Representative Loreto Leo Ocampos nga buhi pa gihapon ang presinsiya sa Kuratong Baleleng, dako kini og mahimong epekto sa natad sa torismo.

Gidugang ni Ramiro nga duna na hinuon silay mga lakang nga giandam aron nga makapadani gihapon og mga katawhan nga mobisita sa lalawigan taliwala sa dili maayong balita nga gipagawas ni Ocampos ilabina ngadto sa national media.

Saysay ni Ramiro nga iyang gidahuman nga normal lamang ang isyu nga sama sa gibuhian ni Ocampos ilabina sa hilisgutanan nga politika apan nagtuo siya nga gi-personal ni Ocampos ang pagpagawas sa nasangpit nga isyu.

Nanawagan na lamang siya sa kongresista nga kon aduna man siyay mga namatikdan dal-on kini sa proper forum og dili na lamang kini dal-on ngadto sa media.

Iyang gipasabot nga ang provincial tourism council aduna nay pamaagi nga nakita aron nga makapadani gihapon og mga torista ang lalawigan.

Pasabot pa ni Ramiro nga sa dihang gobernador pa si Ocampos labing gipaasdang na niini ang torismo sa lalawigan apan karon nga nahimo na kini nga kongresista daw sa giguba niini ang torismo sa lalawigan.

Naalarma usab si Governor Herminia Ramiro niini hinungdan nga mipatawag kini og usa ka emergncy peace and order council meeting, diin iyang gipadayag nga dako ang posibilidad nga adunay mga potential nga mga investors nga mosibog gumikan sa maong taho.

Si Gerald, anak sa gobernador sa Misamis Occidental.

Sumala sa kasaligan nga tinubdan ania na sa Ozamiz City ang giingong taskforce nga mobunkag sa mga private armies.(NEPTALIE BATOLENIO)

MOELCI-II sirad-an saLGU-Ozamiz karong adlawa

POSIBLE nga sirad-an o i-padlock sa Local Government Unit (LGU) Ozamiz ang Misamis Occidental II Electric Cooperative, Inc., (MOELCI-II) karong adlawa, Agosto 18 kon dili kini motubag sa demand nga kinahanglan nga mobayad sila sa ilang wala mabayri nga mga buhis.

Sa usa ka press conference, gipadayag ni Atty. Cornelio Villarino, Jr., Ozamiz City legal officer nga mapugos ang LGU-Ozamiz sa pagpasirado sa buhatan sa MOELCI II, ilabina kon dili nila tagdon ang demand letter nga gipadala.

Saysay ni Villarino nga posible nga i-padlock karong adlawa ang buhatan sa MOELCI- II gumikan kay nag-operate kini nga walay business permit, occupancy permit ug building permit.

Sa iyang kabahin, gipadayag ni Engineer Romeo Cabrera, Ozamiz City Engineer nga andam na ang tanan nga mga gikinahanglan alang sa pagsirado sa buhatan sa MOELCI-II.

Kahinumduman nga nag-ugat ang daw bangi sa MOELCI-II ug sa LGU-Ozamiz human nga gipamutlan sa kutay sa sugang dagitabnon ang nagkadaiyang street lights sa sentrong bahin sa Ozamiz.

Nasayran nga ang LGU-Ozamiz adunay utang sa MOELCI-II nga P16,795,020.24
Gumikan niini giutingkay sa legal departments sa LGU ang records sa MOELCI II.

Nasayran nga adunay utang ang MOELCI II ngadto sa LGU nga P1,622,652.52 sa ilang real property tax.

Tungod usab nga ang MOELCI II dili rehistrado nga kooperatiba ilalom sa Cooperative Development Authority (CDA) sibo sa Republic Act 6938 aduna silay wala mabayri nga Franchise Tax nga P7,101,311.98.

Gisugilon ni Villarino nga ang MOELCI-II igo lamang usab mihatag sa LGU Ozamiz og Statement of Account nga walay actual consumption sa nagamit nga kuryente nga tataw nga paglapas sa Commission on Audit (COA) Rules and Regulation.

Taskforce welcome sa Ozamiz--Echavez

BISAN una na nga migawas ang espekulasyon nga adunay wala matino nga grupo nga moduso og petition nga babagan ang pasulod sa ‘special taskforce’ sa lalawigan sa Misamis Occidental ilabina sa Ozamiz City, gikompirma karon ni Ozamiz City mayor Nova Princess Parojinog-Echavez nga ‘welcome’ sa dakbayan ang maong grupo.

Gidugang ni Echavez nga kon modangat sa siyudad ang Taskforce iya kining dawaton tungod kay nasayod siya nga makatabang kini sa pagpatunhay sa dagan sa kahusay ug kalinaw sa siyudad.

“Very much welcome ang taskforce sa Ozamiz ilabina nga makatabang kini nato,” pasabot sa Mayor.

Iyang gidugang nga makatabang ang taskforce sa peace and order ilabina nga nakasinati ang Ozamiz og kakulang sa gisakupan sa PNP.

Hinuon, gisaysay ni Echavez nga kinahanglan nga moalayon usab sa pangagamhanan sa Ozamiz ang taskforce nga dili makabalda sa mga gimbuhaton sa siyudad.

Kahinumduman nga gumiikan sa giingon nga presensiya sa partisan armed groups (PAGs) sa lalawigan sa Misamis Occidental, butangan ang probinsiya og taskforce aron sa pagsumpo sa armadong grupo.

Ang taskforce mugnaon gikan sa Directorate for integrated police operations (DIPO) aron masiguro nga hingpit nga mabungkag ang mga PAGs.

Sa iyang kabahin, gipadayag ni Misamis Occidental 2nd District representative Loreto Leo Ocampos nga sila si PNP chief director General Jesus Verzosa ug AFP chief Lt. General Ricardo David mipirma og joint directive sa kampanya sa pagbungkag sa mga private armed groups human sa usa ka conference sa Camp Crame PNP headquarters.

Gidugang ni Ocampos nga ang pagmugna sa taskforce kabahin sa marching order ni Presidente Noynoy Aquino sa pagbungkag sa mga armadong grupo. (NEPTALIE BATOLENIO)

Echavez mitubag sa isyu batok sa mga Parojinog

NAHIMONG EMOSYONAL si Ozamiz City mayor Nova Princess Parojinog-Echavez nga miatubang sa mga sakop sa media aron motubag sa mga isyu nga gipagawas ni Misamis Occidental 2nd District Congressman Loreto Leo Ocampos batok sa ilang pamilya ilabina ngadto sa iyang amahan.

Mitulo ang luha ni Echavez sa dihang mitubag sa mga isyu nga gibato ni Ocampos, human nga migawas sa national media ang isyu nga si former Mayor Reynaldo ‘Aldong’ Parojinog, Sr., ang nangulo sa Kuratong Baleleng Ozamiz City nga naglihok sa dakbayan.

Lakip sa akusasyon nga ang iyang amahan ang nagulo sa mga nahitabong bank robberies, carnapping, kidnapping, gun for hire ug drug trafficking.

“Halos tanan nga illegal ang ilang gipasangil sa akong amahan,” dugang sa mayor.

Gidugang sa pagsugilon ni Echavez nga nabalaka siya sa maong isyu tungod kay dili lamang kini isyu batok sa mga Parojinog apan isyu kini batok sa tibuok Ozamiznon nga maapektuhan .

Giangkon ni Echavez nga nabalaka siya karon tungod kay iyang gisabot nga ang iyang amahan ang nahimong target sa isyu.

Nanawagan usab si Echavez sa katawhan sa Ozamiz nga motabang sa pagpanalipod sa iyang amahan ilabina nga nahimo kining maayong mayor sa Ozamiz sulod sa siyam ka tuig nga walay record sa pagpangabuso.

Nagtuo ang mayor nga politika ang hinungdan sa maong isyu.

Nalakbitan usab ni Echavez ang kamatayon kanhi ni former Board member Renato “Nato” Parojinog niadtong tuyig 2002 nga giingong resulta gihapon sa politika nga hangtud karon wala pa mahatagi og hustisya.

“It pains me nga wala pa gyud diya mahuman ang election fever,” dugang ni Echavez.
Saysay ni Echavez nga nakaabot kaniya ang taho nga si kanhi mayor Aldong giakusahan nga responsabli sa plano nga assassination plot ni Presidente Noynoy Aquino III atol sa inagurasyon niini.

Iyang gisabot nga usa ka harassment ang gihimo ni Ocampos ngadto kanila tungod kay nahuman naman unta ang politika.

Gipadayag ni Echavez nga ang taho nga gipagawas ni Ocampos nga adunay partisan armed groups (PAGs) ang Ozamiz City usa lamang ka pormalidad aron malakip ang lalawigan nga mabutangan sa taskforce.(NEPTALIE BATOLENIO)

Ozamiz dunay ‘portable shabu laboratory’?

NAGTUO si Misamis Occidental 2nd District congressman Loreto Leo Ocampos nga adunay shabu laboratory ang Ozamiz City apan sukwahi kini sa naandan nga laboratory.
Gipadayag ni Ocampos nga ang giingong shabu laboratory gitawag nga ‘portable shabu laboratory’.

“Ang laboratory karon sa shabu mobile, portable dili sama kaniadto, karopn duna silay bag-ong teknolohiya,” saysay ni Ocampos.

Gipasabot niini nga minunot usab sa ka abante sa teknolohiya ang shabu laboratory hinungdan nga magbalhinbalhin kini og dapit.

Dugang sa kongresista nga dili lamang sa Pilipinas ang operasyon sa giingong paghimo og shabu apan naglangkob kini sa Southeast Asia.

Pahayag ni Ocampos nga gawas sa bag-ong mga teknolohiya nga gigamit bag-o usab ang mga ingredients nga gigamit sa paghimo og shabu.

“Dako nga operasyon kini, integrated kini sa Luzon, Visayas, Mindanao,” dugang ni Ocampos.

Saysay sa kongresista nga ang maong impormasyon, adunay kasayuran niini ang Camp Crame hinungdan nga usa sa pagpahimutang og Task Force ang pagsumpo usab sa maong kalihukan.

Gipunting usab ni Ocampos nga ang Ozamiz daw nahimong dangpanan sa mga criminal.
Iyang gidugang sa pagsugilon nga kon adunay tulis nga mahitabo sa Manila ang mga criminal modagan ug motago dayon sa Ozamiz City.

“Tulis sa Manila, pag-init na modagan dayon kini sa Ozamiz City,” asoy ni Ocampos.

Nagtuo si Ocampos nga dili mahilabtan sa Ozamiz ang mga criminal tungod klay adunay political protection.

Sa iyang kabahin, una na nga gipadayag ni Ozamiz City mayor Nova Princess Parojinog-Echavez nga naningkamot siya nga mahimong magmalinawon ang Ozamiz.

Apan nasubo lamang siya nga adunay mga tawo nga kanunay nga nangdaot sa Ozamiz City.

Gani pasabot ni Echavez nga mag-hire siya og tawo nga mo-package sa Ozamiz aron mawala na ang dili maayong imahen sa Ozamiz City.(NEPTALIE BATOLENIO)

Navarro napili nga Federated President sa PCL Misamis Occidental

NAKATULO ang luha ni Copuncilor Elsa Navarro sa Lungsod sa Clarin, Misamis Occidental gumikan sa kalipay human siya napili nga Presidente sa gipahigayong election sa PCL Provincial Federation Chapter sa Misamis Occidental niadtong Agosto 9 sa Provincial Cultural and Farmers Center, Oroquieta City.

Gipadayag ni Navarro nga siya nagpasalamat sa Diyos una sa tanan ug sa iyang mga kauban nga mga Konsihal sa nagkadaiyang Lungsod ug siyudad sa Probinsya sa Misamis Occidental sa ilang paghatag kaniya’g kumpiyansa nga mahimo nilang Presidente sa naasoy nga kahugpungan.

Nagpasalamat usab siya sa iyang kapikas nga si Clarin, Municipal Mayor David Navarro gumikan sa pagdasig, pag-abag ug pagsuporta kaniya sa mao nga election sa PCL.

16 botos ang labaw ni PCL Provincial Federation President Navarro sa iyang kaatbang ug kauban nga konsihal sa Lungsod sa Clarin nga si Konsihal Angelito Tagaloguin sa botos nga 61 – 45. Samtang 28 botos ang nakuha ni City Councilor Henry Regalado sa Oroquieta, 15 botos ang nakuha ni konsihal Mario Chenn Castro sa Lungsod sa Clarin ug 14 botos ang kang Konsihal Edemar Alota sa Tangub City. Si Konsihal Benjamin Galindo ang napili nga bisi Presidente nga nakaangkon ug 49 botos kontra nila ni Emilou Animas sa Municipality of Sapang Dalaga nga mitala ug 37 botos, konsihal Mario Ferraren sa siyudad sa Ozamiz 25 botos, Konsihal Rolf Alan Baz 22 botos ug konsihal Ricky Bulahan sa Lungsod sa Bonifacio 18 botos.

Walay miatbang kang Konsihal Kimberly Butalid pagka Secretary General sa PCL Provincial Federation Chapter sa Misamis Occidental.

Si konsihal Florepes Cepe sa Lungsod sa Lopez Jaena ang napili nga Treasurer. Konsihal Rosena Maniwan sa Lungsod sa Sapang Dalaga Auditor. Konsihal Paulita Galleros P.R.O. samtang walay kaatbang sa pagpapili si konsihal Elsie Llanes pagka Business Manager ug BOD’s usab sila si konsihal Jorge Quiza, Konsihal Genaro Jalapit, konsihal Simplicia Neri sa ciudad sa Ozamiz, konsihal Michael Gutierrez ug konsihal Edilberto Gripo.

165 ka mga Municipal and City Councilors sa 14 ka Lungsod ug 3 ka siyudad ang miapil sa gipahigayong Election sa PCL Provincial Federation Chapter sa Misamis Occidental.(NEPTALIE BATOLENIO)

Walay problema ang bugas sa MisOc

ANAA sa maayong kahimtang ang mga bugas sa National Food Authority (NFA) sa mga nagkadaiyang whare houses sa lalawigan sa Misamis Occidental.

Gipadayag ni Glorioso Manlegro, provincial operation officer sa NFA-Misamis Occidental nga sukwahi sa ubang mga wharehouses sa NFA sa nasud, anaa sa maayong kahimtang ang mga bugas sa NFA sa lalawigan.

Gisaysay ni Manlegro nga wala atakiha sa bokbok ug wala mangabaho ang NFR rice dili sama sa ubang bugas sa ubang bahin sa nasud nga gipistahan sa mga ulod busa dili na maayong ipakaon sa mga tawo.

Nasayran nga moabot sa 190,000 ka sinakong NFA rice ang naa sa wharehouses sa NFA-MisOc.

Ang maong gidaghanon sa stock sa NFA rice nahipos gikan sa gihimong procurement kon pagpamalit sa miaging bulan.(NEPTALIE BATOLENIO)

Kuratong Baleleng buhi pa--Ocampos

NAGSUNGI ang pamahayag sa kongresista sa ikaduhang distrito sa lalawigan sa Misamis Occidental ug sa Mayor sa Ozamiz City may kalambigitan sa giingong presisnsiya sa Kuratong Baleleng sa dakbayan.

Bisan tuod nga sila si Ozamiz City Mayor Nova Princess Parojinog-Echavez ug Kongresista Loreto Leo Ocampos managsamang nag-angkon nga gusto sila nga makabaton og usa ka malinawon nga dapit apan wala sila magkauyon sa baruganan may kalambigitan sa presinsiya sa Kuratong Baleleng.

Saysay ni Echavez nga ang orihinal nga Kuratong Baleleng dako og gikatabang sa Ozamiz City tungod kay kini gimugna batok sa suliran sa insurhensiya. Human niadto nabungkag na kini.

Giangkon sa mayor nga ang Kuratong Baleleng dugay na nga nabungkag ug walay kamatuoran ang pagtuo sa uban nga adunay grupo sa Kuratong Baleleng nga mohimo sa pagpanulis ug mohimo sa unsa man nga krimen.

Hinuon, giangkon sa mayor nga adunay ‘stigma’ ang Ozamiz City nga nalambigit ang grupong Kuratong Baleleng.

Saysay ni Echavez nga adunay ubang tawo nga migamit sa maong grupo nga mihimo og mga dili maayong buhat.

Dugang niini nga karon nga siya nahimong mayor sa Ozamiz dili kalikayan nga aduna gyuy mangutana kaniya maykalambigitan sa kahimtang sa Ozamiz ilabina nga apo siya ni Octavio 'Ongcoy' Parojinog, Sr., ang founder sa Kuratong Baleleng.

Dugang ni Echavez nga usahay mahimuot siya sa mga moduol ug makigsulti kaniya may kalambigitan sa Ozamiz tungod kay ang tan-aw sa ubang tawo sa dakbayan ilabina sa kaulohan ug sa ubang lugar ang Ozamiz dapit sa Kuratong Baleleng.

Dili usab malikayan nga anaa sa mga tawo nga idugtong sa Kuratong Baleleng ang bansagon nga Parojinog, ilabina nga siya anak ni kanhi Mayor Reynaldo 'Aldong' Parojinog, Sr.

Nakita ni Echavez nga usa ka bintaha nga siya mayor tungod kay makahimo na siya sa pagsaysay ngadto sa mga tawo nga magpakisusi may kalambigitan sa Kuratong Baleleng.

Dugang niini nga mosamot nga dili maayo ang dungog sa Ozamiz ilabina kon adunay mga tawo nga magsige og pangdaot sa siyudad.

Sa iyang kabahin, gipdayag ni Ocampos nga common knowledge sa katawhan sa Misamis Occidental ilabina sa Ozamiz City nga aduna pa gihapon ang Kuratong Baleleng diin usa kini sa gitumbok nga partisan armed groups (PAG’s) ni PNP chief Jesus Verzosa.
“Kuratong Baleleng still alive,” saysay ni Ocampos.

Iyang gidugang nga kinahanglan nga dawaton ang kamatuoran aron nga kahatagan kini og kasulbaran nga dunay suliran ang Ozamiz may kalambigitan sa mga nahitabong krimen.

Hinungdan nga nanawagan siya sa mga kadagkuan sa Ozamiz City nga dawaton ang kamatuoran nga adunay suliran ang siyudad ug mag-hiusa sila alang sa pagsulbad niini.

Una na usab nga gipadayag sa kongresista nga ang Taskforce nga modangat sa lalawigan sa Misamis Occidental nakasentro kini sa pagwagtang sa mga armadong grupo nga mihimo sa nagkadaiyang krimen.

Bisan tuod nga ang duha ka mga opisyal magkasungi sa pipila ka mga baruganan apan pulos sila gusto og kalinaw alang sa maayong pagserbisyo ngadto sa katawhan.(NEPTALIE BATOLENIO)

MisOc butangan og taskforce batok PAGs--Ocampos

GUMIKAN sa giingon nga presensiya sa partisan armed groups (PAGs) sa lalawigan sa Misamis Occidental, butangan ang probinsiya og taskforce aron sa pagsumpo sa armadong grupo.

Ang taskforce mugnaon gikan sa Directorate for integrated police operations (DIPO) aron masiguro nga hingpit nga mabungkag ang mga PAGs.

Ang lalawigan sa Misamis Occidental lakip sa Abra ug Masbate nga labing gitutukan sa awtoridad.

Gipadayag ni Misamis Occidental 2nd District representative Loreto Leo Ocampos nga sila si PNP chief director General Jesus Verzosa ug AFP chief Lt. General Ricardo David mipirma og joint directive sa kampanya sa pagbungkag sa mga private armed groups human sa usa ka conference sa Camp Crame PNP headquarters.

Nasayran nga sa 107 ka mga PAGs adunay 65 niini ang padayon nga naglihok sa tulo ka mga lalawigan.

Gidugang ni Ocampos nga ang pagmugna sa taskforce kabahin sa marching order ni Presidente Noynoy Aquino sa pagbungkag sa mga armadong grupo.

Saysay sa kongresista nga iyang gi-request nga mabiutangan og taskforce ang lalawigan diin iyang gi-special mention ang Ozamiz City apan natukma usab tungod kay gaplano nang daan ang AFP nga butangan og taskforce ang lalawigan.

Saysay ni Ocampos nga ang matag-dapit adunay lainlain nga approach alang sa pagsulbad sa mga armadong grupo.

Gikutlo usab ni Ocampos ang pamahayag ni Versoza nga ang lalawigan sa Abra ug Masbate adunay gitawag nga culture of violence tungod sa presinsiya sa mga armadong grupo.

Samtang sa Misamis Occidental giingong taudtaod na nga gaantos sa taas nga higayon sa presisnsiya sa mga criminal elements nga nalambigit sa smuggling, kidnap for ransom, robbery ug drug trafficking.

Kahinumduman nga una na nga miiktad si Ozamiz City mayor Nova Princess Parojinog-Echavez sa pagkalakip sa Misamis Occidental nga nalinya sa Masbate ug Abra nga adunay armadong mga grupo.

Diin gisaysay niini nga si Verzosa gihatdan lamang og sayop nga impormasyon.(NEPTALIE BATOLENIO)

PNP MariCom nanawat og aplikante

SA tuyo nga labing mapalig-on ang kahugpungan sa Philippine National Police, Maritime Group nagsugod na sila karon sa pagpangdawat og mga aplikante niining tuiga alang sa Police officer 1 (PO1).

Sa pahibalo nga gipadangat ni Police senior inspector Nolasco Ratilla, sa 1003rd Maritime police station nga nakabase sa Ozamiz gisaysay niini nga kini pinaagi sa regular recruitment program.

Gidugang niini nga ang tanan nga mga na-screened nga mga aplikante moadto lamang sa headquarters sa Regional Maritime office 10 nga nahimutang sa Puntod, Cagayan de Oro City diin pagkahuman i-indorsed kini sa ilang ulohang buhatan sa Camp Crame sa pagka Septiyembre 7.

Nasayran usab nga himuon ang agility test sa pagka Septiyembre 14.

Gisaysay ni Ratilla nga ang mga rekisitos alang sa mga aplikante naglangkob sa personal data sheet-CSC form 212, Birth certificate nga authenticated sa NSO, Diploma o transcript of records, elegibilities, mga clearances nga naglangkob sa :barangay, polilce, mayor, fiscal, MTC, RTC, ug NBI; apil usab sa requirement ang handwriting spicemen, fringer print, usa ka whole body picture ug duha ka 2x2 ID picture.

Gikinahanglan usab ang physical examination, drug test ug Neuro examination. (MICHAEL TAMALA)

MisOc walay partisan armed group--Echavez

MIIKTAD ang usa ka mayor sa lalawigan sa Misamis Occidental sa gipahayag ni Philippine National Police (PNP) chief, director general Jesus Versoza nga nalakip ang probinsiya sa mga dapit nga adunay gitawag nga ‘partisan armed groups’ (PAGs) nga padayon nga naglihok hangtud karon.

Gipadayag ni Ozamiz City Nova Princess Parojinog-Echavez nga dili makatarunganon ang gipahayag ni Verzosa tungod kay walay kamatuoran ang nasangpit nga balita.

Bisan wala hinganli ni Verzosa ang Ozamiz City, gipadayag ni Echavez nga mipagawas siya sa maong reaksiyon tungod ka yang dakbayan nasakop man sa Misamis Occidental.

Nagtuo si Echavez nga ang PNP chief gihatdan og sayop nga impormasyon hinungdan nga nakapagawas sa nasangpit nga balita.“I believe he was feed by wrong information,” saysay ni Echavez.

Bisan wala hinganli ni Echavez ang tawo nga naghatud sa impormasyon iyang gisaysay nga usa kini ka dakong opisyal sa Misamis Occidental.

Kahinumduman nga migawas sa Manila Bulletin newspaper niadtong Agosto 2, ang pahayag ni Verzosa nga gitumbok ang probinsiya sa Abra, Masbate ug Misamis Occidental nga adunay daghang sakop sa mga armadong tawong o PAGs.

Gani mihangyo ang PNP sa militar nga magpatabang sa pagsumpo sa mga armadong grupo.

“This will be a reinvigorated fight against partisan armed groups, our continuous neutralization against partisan armed groups will now include the Armed Forces of the Philippines,” pahayag ni Verzosa.

“We will be coming up with a joint letter directive for policy for our troops, probably this week” dugang niini.

Base sa bag-o nga operational plan, gisaysay ni Verzosa nga tulo ka mga dagkong taskforce ang mugnaon nga nakasentro sa Masbate, Abra ug Misamis Occidental.

Sibo sa intelligence report nga sa kinatibuk-an adunay 80 ka partisan armed group, nga tanan kanila naglihok sa mga ‘badlongong politiko’ nga padayong naglihok sa nasud ug ang labing daghan anaa sa tulo ka mga probinsiya.

Tinguha usab ni Echavez nga makigkita ni Misamis Occidental governor Herminia ‘Hermie’ Ramiro may kalambigitan sa maong isyu.

Gani apil sa iyang plano nga makig-audience sa PNP chief ug pasabton kini nga walay kamatuoran ang nasangpit nga balita.

Saysay ni Echavez nga kon mahimo, iyang imbitahon si Verzosa ug isuroy sa Ozamiz unsa ka malinawon ang dakbayan.

Kahinumduman, nga si kanhi gobernador ug karon kongresista sa ikaduhang distrito sa Misamis Occidental Loreto Leo Ocampos ang bokal kayo nga mipadayag nga ang Ozamiz City adunay grupo sa mga armado.(NEPTALIE BATOLENIO)

Meningococcemia mitakboy sa bata sa Tinago

GITUOHAN nga meningcococcemia ang mitakboy nga sakit sa usa ka dos anyos nga bata sa Barangay Tinago, Ozamiz City sibo usab sa obserbasyon sa tambalanan.

Nasayran nga gidala sa Medina Hospital ang usa ka Gian Herungay, 2 anyos nga nagpuyo sa Purok Malig-on, Tinago, Ozamiz City.

Sa pagpakighinabi ni Barangay Tinago councilor Raul Licayan, gipadayag niini nga unang gituohan nga dengue fever ang mitakboy sa maong bata apan paglabay sa tulo ka adlaw migrabe kini ug namatay.

Sibo usab sa pahayag sa obersbasyon sa doktor sa tambalanan gidudahan nga meningcococcemia ang mitakboy nga sakit sa maong bata.

Ang pamilya sa maong bata, nasayran nga gikan sa Manila duha ka bulan ang nakalabay.
Hinungdan nga dali dayon nga gimando nga ipalubong gilayon ang maong bata, sa posibleng pagtakod sa maong sakit.

Dali usab dayon nga gipa-inom og tambal ang mga tawo nga adunay direct contact sa maong bata aron malikayan nga nga sila matakdan sa maong sakit.

Pinaagi ni Dr. Daniel Medina, health officer sa Ozamiz City dali usab nga mihatag og tambal.

Nasayran nga unang na panic ang mga katawhan sa maong dapit apan mikalma kini sa dihang gipasabot ni Licayan.

Nanawagan si Licayan sa katawhan nga dili lang magpanic tungod kay padayon pa nga gisuhid ang maong hitabo.(NEPTALIE BATOLENIO)

Gitubag ni Lana ang iyang pagka-disqualify

MIIKTAD ang mayor sa lungsod sa Baliangao, Misamis Occidental sa migawas nga balita sa giingong pagka-disqualify niini sa pagkamayor sa nasangpit nga lungsod tungod sa isyu sa residency.

Gipadayag ni Mayor Svetlana ‘Lana’ Jalosjos nga dili makatarunganon ang pagpresenta sa maong balita tungod kay daw nagpasabot nga pinal na kini ug katapusan na sa tanan.
“It was unfair and made to be presented as something that is final,” padayag ni Jalosjos.

Gidugang ni Jaloslos nga adunha nay gihimo ang iyang mga abogado sa nasangpit nga kaso.

Bisan pa man nga wala direkta nga giangkon ni Jalosjos nga aduna siyay nadawat nga desisyon gikan sa Commission on Elections (COMELEC) apan iyang gipadayag nga anaa lamang kini sa ubos nga hukmanan nga disisyon.

Iyang gidugang nga human niini moadto pa kini sa COMELEC en banc ug pagkahuman ngadto sa korte suprema.

“It’s a long process it takes even finishing my terms and even more,” dugang ni Jalosjos.

Nasayran nga pinaagi sa lima ka pahina nga resolution sa COMELEC second division gi-disqualify si Jalosjos sa election court tungod sa kuwestiyon sa residency.

Ang maong ruling gipirmahan nila ni Comelec Commissioners Nicodemo Ferrer, Lucenito Tagle ug Elias Yusoph, gisaysay niini nga si Lana napakyas sa pag-establisa sa iyang residency, nga magtugot kaniya nga makadagan ug makalingkod isip mayor sa nasangpit nga lungsod.

Si Svetlana midaog isip mayor sa Baliangao batok ni Agne Yap, Sr., sa unom ka butos lamang ang labaw. Si Lana isip artist mao karon ang nagdala sa negosyo sa pamilya nga Fantasyland sa Dapitan, Zamboanga del Norte.

Gidugang sa COMELEC nga si Svetlana napakyas sa iyang ‘ lawasnon presensiya’ sa Baliangao ug sa iyang intention nga magpabilin sa maong dapit ug sa intention nga dili na mobalik sa iyang gigikanan, ang Dapitan City.

“As it is, respondent even admitted that she is the one attending to their family businesses in Dapitan City. Her claim that she purchased two parcels of land in Baliangao is not backed up by any title. More importantly, the local officials of Baliangao in their joint affidavit declared that they have not seen respondent in their locality,” saysay sa maong dokumento.

Gipunting usab sa election court nga ang katuyuan sa residency requirement mao ang pagsanta sa newcomer, nga dili suheto sa kondisyon ug mga panginahanglanon sa komunidad nga tinguha niining daganan.

Ang maong kaso giduso sa mga petitioners nga sila si Edwin Elim Tumpag ug Rodolfo Estrellada.

Gawas sa maong kaso, adunay desisyon si Lana nga nadawat sa laing election protest nga na-dismissed dili pa lamang dugay apan wala na niya kini gipaklaro sa pagsaysay sa mga sakop sa media.

Nanawagan na lamang si Jalosjos ngadto sa iyang mga kaatbang nga responsabli sa pagpasaka og kaso nga magtambayayong sila alang sa kaayohan ug kalamboan sa katawhan sa lungsod sa Baliangao.(NEPTALIE BATOLENIO)

LGU miduso og demand letter sa MOELCI- II

GIISIP ni Ozamiz City mayor Nova Princess Parojinog-Echavez nga dili patas alang sa local government unit ang gihimo nga pagpamutol sa Misamis Occidental Electric Cooperative II (MOELCI-II) sa mga street lights sa pipila ka dapit sa sentrong bahin sa dakbayan.

Gipadayag ni Echavez nga daw giyatakan ang katungod sa local government unit (LGU) sa Ozamiz nga makaangkon sa serbisyo sa sugang dagitabnon sa MOELCI-II.

Giangkon sa mayor nga ang Ozamiz adunay utang nga P11 M apan andam sila nga mobayad niini.

Gani niining bag-o mibayad sila og P300,000 aron lang mabalik ang kutay sa kuryente sa mga street lights ilabnina sa sentrong bahin sa Ozamiz diin nahimutanng ang daghang mga dagkong business establishments.

Giisip ni Echavez nga bangis alang sa LGU-Ozamiz ang gihimo sa MOELCI II.
Gumikan niini giutingkay sa legal departments sa LGU ang records sa MOELCI II. Nasayran nga adunay utang ang MOELCI II ngadto sa LGU nga P1,622,652.52 sa ilang real property tax.

Tungod usab nga ang MOELCI II dili rehistrado nga kooperatiba ilalom sa Cooperative Development Authority (CDA) sibo sa Republic Act 6938 aduna silay wala mabayri nga Franchise Tax nga P7,101,311.98.

Nasayran usab nga ang MOELCI-II nag-operate nga walay business permit ug mga regulatory clearances.

Dugang ni Echavez nga tinguha usab nila nga ipasuhid sa City Engineers Office may kalambigitan sa ilang occupancy permit tunhgod kay ang orihinal nga dapit nga gibutangan sa ilang opisina karon gigamit nga resiodential area, diin posible nga nakalapas kini sa Building Code.

Gisugilon ni Echavez nga ang MOELCI-II igo lamang usab mihatag sa LGU Ozamiz og Statement of Account nga walay actual consumption sa nagamit nga kuryente nga tataw nga paglapas sa Commission on Audit (COA) Rules and Regulation.

Dugang sa mayor nga tungod niini kinahanglan nga i-reconcile ang ilang billing ug dili kay ipaagi sa pagpamutol sa mga street lights nga nayatakan ang katungod sa katawhan.

“There was even an instance where MOELCI-II billed us with statements of accounts as their supporting documents in the amount of P1.5 M after which due study by our pre-audit personnel we found out that it is duly paid because og the check issued,” saysay ni Echavez.

Nasubo si Echavez tungod kay ang ilang gibayad sa kasamtangan nga consumption gidapat kini sa daan nga utang hinungdan nga ang bag-ong billing mag- arrears na usab kini.

Gani makadaghan nga gitawagan sa kampo ni Echavez si MOELCI-II general manager Jimelou Pelimer apan kanunay kini nga out of coverage area.

Gumikan niini nga mga katarungan, miduso ang LGU Ozamiz og Notice and demand Letter ngadto sa MOELCI-II. Diin kon dili kini matubag sulod sa kinse ka adlaw possible nga ipasira kini.

Sibo sa nalatid sa notice and demand letter, tinguha niini nga ma-reconcile ang billing ug ang balayrunon sa MOELCI-II ngadto sa LGU Ozamiz diin gipangayo niini nga adunay offsetting nga mahitabo.

Ang kinatibuk-an nga balayrunon sa MOELCI-II sa Ozamiz moabot sa P8, 723,964.5 nga kon i-offset sa P11 M nga utang sa siyudad adunay deperensiya nga P3.7 M.
Gitinguha usab sa PNN nga mahinabi apan atua kini sa kaulohan.(NEPTALIE BATOLENIO)

Forum alang sa RA 9994 ug RA 9442 gipahigayon

SA tuyo nga mosanong ang business sector sa Ozamiz City sa pagpatuman sa duha ka balaod national alang sa mga senior citizens ug sa mga disable persons, gipahigayon ang usa ka consultation forum niadtong Agosto 3 sa Asian Hotel.

Ang consultation gitambungan sa mga nagkadaiyang representante sa business sector, mga senior citizens ug ingon man mga persons with disabilities.

Gihisgutan sa forum nagtuki sa Republic Act 9994 o mas naila nga Expanded Senior Citizens Act of 2010 ug ang RA 9442 o Persons with Disabilities Privileges and Incentives Act.

Kahinumduman nga unang miiktad ang mga magpapatigayon sa siyudad nga mohatag og 20% discount sa mga sakop sa senior citizens ug sa mga katawhan nga adunay apan sa ilang lawas sa katarungan nga lugi sila sa maong sistema.

Apan human nga mabati ang pagpasabot sa nasangpit nga nasudnong balaod, kadaghanan sa mga magpapatigayon walay nahimo kon dili misaad nga magsunod sa nasangpit nga kamanduan.

Atol sa consultation forum nahimong resource person si Judge Meriam Anggot, executive judge sa MTCC Ozamiz City.

Gipasabot sa huwes ang tumong sa pagkamugna sa naasoyng balaod ug ang mga tugbang nga silot ngadto sa mapamatud-ang makalapas sa naasoyng mga balaod.

Si city mayor Nova Princess Parojinog-Echavez kusganon usab nga misuporta sa panawagan sa mga people with disabilities ug sa mga senior citizens sa pagbutang og tukmang mga rampa sa matag-balay pamatigayon sa Ozamiz.

Padayag pa sa batan-ong mayor, nga mahinungdanon nga matubag ang mga panginahanglan sa mga sakop sa people with disability ug sa mga senior citizens aron usab ilang mabati nga kabahin pa gihapon sila sa pagbugtaw sa kalamboan ug kaayohan ilalom sa iyang liderato.(NEPTALIE BATOLENIO)

Empleyado nga palautang, aksiyonan sa mayor

ISIP kabahin sa pag-overhaul sa Ozamiz City Hall, usa sa gitutukan ni Mayor Nova Princess Parojinog-Echavez ang mga empleyado nga naputos ug nalubong sa utang.

Nasuta sa mayor nga usa kini sa rason nga ang mga empleyado magtinapol ug magbinulakbol sa ilang mga trabaho tungod kay wala nay mabalin sa ilang suweldo kay taman lang usab kini ibayad sa ilang utang.

Dugang niini nga dili na makatarong sa pagtrabaho ang mga empleyado tungod kay maghunahuna kini og asa makakuwarta alang sa pagsuporta sa ilang pamilya.

Gi-discourage usab sa mayor ang mga empleyado sa pagbaligya sa ilang sweldo ug magpasagad sa pag-ngutang sa mganagpalibot nga mga lending institution.

Gipadayag sa usa ka wala magpaila nga empleyado nga napugos usab sila sa pagbaligya sa ilang suweldo tungod kay langan sila nga masuweldohan sa Ozamiz City Hall.

Gisaysay ni Echavez nga isip inahan sa Local Government Unit (LGU) dili niya gusto nga mag-antus ang iyang mga anak sa butang pinansyal ug tinguha niya nga matabangan ang matag usa aron mo-asenso.

Gidugang sa batan-ong mayora nga iyang kalipay nga makita ang iyang mga empleyado nga epektibo sa ilang gimbuhaton aron sa ingon makahatag og makatagbaw nga serbisyo ngadto sa katawhan.(ARN ANTONETTE CAROLLO ug NEPTALIE BATOLENIO)

Motorcab driver, giposil-patay

HIKABSAN sa iyang kinabuhi ang usa ka motor cab driver human kini posila sa wala mailhi nga mga suspetsado niadtong Agosto 3, alas 6:45 sa buntag.

Giila ni Police officer 3 Henry Ellorin, duty field investigator sa Ozamiz PNP ang biktima nga usa ka Joan Noval y Butalid 36 anyos ang pangidaron, minyo ug lumolopyo sa Barangay Banadero, Ozamiz City.

Sibo sa imbestigasyon, ang biktima gikan naghatud sa iyang anak sa eskuylahan sakay sa iyang motor single.

Paghidangat niini duol sa Maya Store sa Circumferential road, kalit lamang kining gipusil saw ala mailhi nga suspetsado.

Nakaangkon og samad pinusilan ang biktima sa iyang liog ug sa bukton nga maoy gituohan nga hinungdan sa hinanali nga kamatayon niini.

Nakuha sa dapit nahitabuan ang duha ka basiyo sa kalibre .45 nga pistol.

Gipadayag sa asawa niini nga si Ailen nga aduna silay namatikdan nga duha ka tawo nga nagsunod-sunod sa iyang bana sa wala pa mahitabo ang nasangpit nga krimen.

Sa pagkakaron padayon pa nga gilusad sa kapolisan ang imbestigasyon sa nasangpit ngha hitabo.

Nova ug ang Kuratong Baleleng

NAGPLANO si Ozamiz City mayor Nova Princess Parojinog-Echavez nga mo-hire og tawo nga maoy mo-package sa siyudad aron monindot ang imahen sa dakbyan sa tuyo nga makapadani og daghang mga magpapatiogayon nga magtukod og negosyo.

Ang pamahayag sa mayor may kalambigitan sa 'stigma' nga ang Ozamiz, siyudad nga anaa ang daghang organisadong kriminal mga grupo, gangster, tulisan ug mga druglords.
Saysay ni Echavez nga karon nga siya nahimong mayor sa Ozamiz dili kalikayan nga aduna gyuy mangutana kaniya maykalambigitan sa kahimtang sa Ozamiz ilabina nga apo siya ni Octavio 'Ongcoy' Parojinog, Sr., ang founder sa Kuratong Baleleng.

Dugang ni Echavez nga usahay mahimuot siya sa mga moduol ug makigsulti kaniya may kalambigitan sa Ozamiz tungod kay ang tan-aw sa ubang tawo sa dakbayan ilabina sa kaulohan ug sa ubang lugar ang Ozamiz dapit sa Kuratong Baleleng.

Dili usab malikayan nga anaa sa mga tawo nga idugtong sa Kuratong Baleleng ang bansagon nga Parojinog, ilabina nga siya anak ni kanhi Mayor Reynaldo 'Aldong' Parojinog, Sr.

Nakita ni Echavez nga usa ka bintaha nga siya mayor tungod kay makahimo na siya sa pagsaysay ngadto sa mga tawo nga magpakisusi may kalambigitan sa Kuratong Baleleng.
"I have tha chance and the oppurtunity to explain to them unsa gyud diay ang Kuratong Baleleng sa Ozamiz," pahayag ni Echavez.

Gidugang ni Echavez nga ang Kuratong Baleleng dako og gikatabang sa Ozamiz tungod kay usa kiini ka anti-insurgency group mnga gtiukod sa iyang apohan nga si Ongcoy Parojinog.

Sukwahi sa nanggawas nga giingong Kuratong Baleleng nga nanggawas nga nalambigit sa bank robbery ug uban pang kremin.

Saysay ni Echavez nga dili angay kahadlokan ang Ozamiz tungod kay walay Kuratong Baleleng karong panahuna tungod kay taudtaud na nga nabungkag na kini human sa pagkahanaw sa hulga sa insurhensiya sa Ozamiz.

Nasayran nga ang Ozamiz lamang sa tibuok lalawigan ang walay hulga sa insurhensiya sa pagkakaron.

Hinuon, giangkon ni Echavez nga adunay daghang tawo nga mogamit sa maong grupo.(NEPTALIE BATOLENIO)

Echavez sulbaron ang kremin sa Ozamiz

TUNGOD sa namatikdan nga nagkahitabong kremin sa Ozamiz City sama sa hold-up, carnap, kawat ug mga kaso sa pagpamusil nga kadaghanan wala mahatagi og kasulbaran, gipasalig sa mayor nga usa kini sa iyang prayuridad.

Gipadayag ni Ozamiz City Mayor Nova Primcess Parojinog-Echavez nga wala siya magkulang sa pagsuporta sa mga sakop sa kapolisan aron mahimong epektibo kini sa ilang mga tahas ilabina sa pagsulbad sa nagkadaiyang krimen.

Saysay ni Echavez nga dili niya pasagdan ang Ozamiz ilabina sa hilisgutanan sa dagan sa kahusay ug kalinaw.

Gidugang sa batan-ong mayor nga kanunay niya nga gipatawag si Police superintent Raul Diones, chief of police sa Ozamiz aron mapklaro ang dagan sa kahusay ug kalinaw.

Gipunting ni Echavez nga ang pagmintina sa dagan sa kahusay ug kalinaw sa Ozamiz tahas sa kapolisan hinungdan nga igo lamang gayud siya nga mosuporta sa lihok sa PNP.

Nalakbitan usab ni Echavez nga dili siya mamuwerhisyo ni kanhi Mayor Reynaldo Parojinog, Sr., ug Board member Ricardo Ardot Parojinog nga naila sa Ozamiz nga mangunay gayud sa pagpangdakop sa mga kriminal.

Gihinapos ni Echavez nga aduna na silay mga han-ay nga gimugna alang sa pasulbad sa nagkadaiyang krimen sa Ozamiz.(NEPTALIE BATOLENIO)

GITUOHANG LEADER SA PAGs, NASIKOP

BALIANGAO, MisOcc - Naaresto ang usa ka gituohang leader sa Private Armed Group kon PAGs pinaagi sa usa ka joint operation sa mga sakop sa Misamis Occidental Police Provincial Office, 10th Regional Public Safety Battalion ug 55th Infantry Battalion Philippine Army, kinsa managsamang sakop sa Task Force Lion nga gipanguluhan ni Police Senior Inspector Melfin Ian Burlat .

6:20 ang takna sa buntag kaniadtong adlaw’ng sabado Agosto 21, samtang nagpahigayon ang maong grupo og usa ka special police operation sa isla sa Barangay Naburos, Baliangao, Misamis Occidental, malampusong nasikop sa mga awtoridad ang usa ka nag-ngalan og Francisco Daque Jr. y Garcia alyas Dondon, 38 anyos, menyo, kinsa lumolopyo sa naasoy’ng lugar.

Si Daque gi-aresto pinaagi sa gahum sa patong-patong nga warrant of sa kasong:
Murder kon pagpatay , 2 ka kasong frustrated murder, Homicide, Arson ( kon kasong pagpanunog ) ug pagpangawat .

Atol sa maong operasyon nakompiska gikan mismo sa suspetsado ang usa ka unit nga Elisco M16 Rifle nga may 5 kabuok short magazine ug 28 ka mga buhing bala; usa ka unit nga springfield Caliber 30 M1 Garand Rifle nga may 8 kabuok buhing bala, usa ka unit nga Colt 45 Pistol kauban ang usa ka magazine nga may sulod 2 ka buhing bala ug usa ka unit nga iCOM IC –V handheld radio.

Sa pagkutlo ning balita ang maong suspetsado anaa pa sa custodia sa Misamis Occidental PNP alang sa dugang documentasyon sa dili pa kini pormal nga i-turn over ngadto sa korte diin gipagawas ang maong warrant of arrest.