SP mihatag og ayudang pinansyal sa MONHS alang sa ilang research program

Gi-aprobahan gilayon sa mga sakop sa Sangguniang Panlalawigan sa Misamis Occidental ang ayudang pinansyal nga gipangayo sa mga estudyante ug mga adviser sa Misamis Occidental National High School atol sa regular session sa mga SP member niadtong biernes.

Gipasabot ni Second District Board Member Henry Oaminal nga walay langan nila kining gikauyonan human nila nakita nga adunay maayong sangpotanan ang gihimong actual nga pagtuon sa mga estudyante sa MONHS sa kasamtangang kahimtang karon sa Morcillagos Bay nga maoy gikuhaan sa ilang panginabuhian sa katawhan gikan sa Baliangao, Calamba, Plaridel ug Lopez Jaena ug sa mga bayabayon nga sakop na sa Zamboanga Del Norte.

Ang actual nga pagtuon nga gihimo sa mga estudyante sa MONHS sa Morcillagos Bay mao kadto ang ilang gi-present sa gipahigayon nga Regional Science Fair didto sa Gusa, Cagayan de Oro City niadtong Noviembre diin sila ang nakakuha sa unang dapit.

Ang ayudang pinansyal nga gi-aprobahan sa konseho maoy gamiton sa team alang sa ipahigayon nga science fair national level didto sa Tacloban City diin ang team sa MONHS maoy mo-represent sa region-10. (Leoncio Medallo)