Labing dako nga dam gitrabaho

TANGUB CITY--Sa tuyo nga labing maserbisyohan ang katawhan ilabina ang mga mag-uuma, gisugdan na sa pagtrabaho sa National Irrigation Administration (NIA) ang dam nga nahimutang sa barangay Bongabong niining dakbayan.

Gipadayag ni NIA resident engineer Luisito Cadelina nga kon matapos ang nasangpit nga proyekto kini ang labing dakong dam sa lalawigan sa Misamis Occidental.

Ang maong proyekto gipundohan sa national government nga mokabat sa P225 M ug P200 M alang sa irrigation project, pasabot nga ang kinatiubuk-an moabot sa P425 M.

Gidahuman nga mokapin sa 600 ka mga mag-uuma ang makapahimulos nga naggikan sa Barangay Prenza, Santa Crus, Barangay VII, San Apolinario, Garang, Labuyo ug Maquilao.

Una niini, gipadayag ni Atty. Philip Tan, president sa Northwestern Mindanao State College of Science and Technology (NMSC) nga kon matapos ang maong proyekto dako kini og ikatabang sa produksiyon sa bugas sa lalawigan diin makatabang sa suliran sa kagutom.

Ang maong proyekto gikatakda nga mahuman sa tuig 2013.