Dili kinahanglan nga isalig tanan sa gobiyerno

CALAMBA,MisOc—Dili kinahanglan nga magsalig lamang sa gobiyerno ang katawhan apan labinbg mayo nga maningkamot usab ang matag-usa.

Gipadayag ni Mayor Luisito Villanueva sa Calamba,Misamis Occidental sa pagpakighinabi sa Misamis Occidental News nga ang local government unit (LGU) kanunay nga naningkamot sa pagtabang sa katawhan ilabina sa pagpataas sa ilang household income apan dili kini mahimo sa gobiyerno kon sila lang ang saligan kinahanglan usab ang paningkamot sa matag-usa.

Gisaysay ni Villanueva nga gikinahanglan ang kakugi aron nga makabaton og taas nga kinitaan.

Iyang gipasabot usab nga dili maayo nga mamili og trabaho, ilabina nga adunay pipila nga gusto gyud nga mosulod sa munisipyo aron makatrabaho. Kinhanglan unsa ang bakante nga masudlan pahimuslan sa matag-usa.

Gisaad usab ni Villanueva nga kutob sa mahimo sa LGU ilang paningkamutan nga matuman ang mga tahas sama sa pagmugna og daghang mga proyekto.

Giawhag usab ni Villanueva ang katawhan nga moabayad sa ilang obligasyon nga buhis tungod kay diri usab gikuha ang alang sa paghimo og mga proyekto.