Nova: Kon dili si Leo motabang adto ko ni Jeorge

POSIBLE nga sa kongresista sa unang distrito sa lalawigan sa Misamis Occidental si Ozamiz City mayor-elect Nova Princess Parojinog-Echavez moduol kon ugaling nga magdumili si 2nd District congressman-elect Loreto Leo Ocampos nga motabang kaniya sa mga proyekto alang sa Ozamiz.

Gipadayag ni Echavez nga kon ugaling dili malimtan ni Ocampos ang bangi sa politika dako ang posibilidad nga dili mohatag og ayuda kaniya ang napili nga kongresista sa ikaduhang distrito sa lalawigan.

Kahinumduman nga unang gipadayag ni Ocampos nga ang mga proyekto nga iyang ibubo sa Ozamiz dili kini moagi sa mga opisyal apan iya kining idiretso ngadto sa katawhan.
“Ang proyekto nato sa Ozamiz diretso sa tawo mao nga dili mabalaka ang katawhan tungod kay aduna kita daghang mga proyekto dinha,” saysay ni Ocampos.

Gumikan niini gisabot nga dili moagi si Ocampos sa napili nga opisyal sa Ozamiz gani mipadayag pa kini nga si Echavez mahimong mayor sa Ozamiz sulod sa mubo nga higayon.

Hinuon, gipasalig sa outgoing governor nga dili mahigawad ang mga Ozamiznon sa unsa man nga mga proyekto nga gikan kaniya.

Sa iyang kabahin, gisaysay ni Echavez nga kon dili gayud mahimo nga motabang si Ocampos adto na lang siya ni 1st District congressman-elect Jorge Almonte, nga parehas niya og partido ang Lakas-Kampi-CMD.

Apan wala gihapon magpakawala sa paglaum si Echavez nga unsa man ang mga bangi sa politika nga mahilot ra nila kini ni Ocampos ilabina nga nakasentro niini ang ilang panerbisyo ngadto sa katawhan.

Hinuon, managsamang nanawagan ang duha ka mga opisyal og reconciliation apan hangtud karon wala pa magkasulti ang duruha sa personal.(NEPTALIE BATOLENIO)