Ocampos motabang sa pagsulbad sa krimen sa Ozamiz, Echavez bukas sa tabang

GUMIKAN sa sunod-sunod nga krimen nga nahitabo sa Ozamiz City sama sa carnap, hold-up, tulis ug mga kaso sa pagposil, gipasalig ni Misamis Occidental 2nd District representative Loreto Leo Ocampos nga mohimo siya og lakang sa pagsulbad niini.

Gipadayag ni Ocampos nga unang-una ang kahimtang sa dagan sa kalinaw sa Ozamiz usa sa mga principal job sa mayor ug unsa ang mahitabo sa dakbayan mo-reflect kana sa matang sa leadership sa dakbayan.

Gidugang ni Ocampos nga kinahanglan usab nga manggilabot ang katawhan ug mga lumolopyo sa siyudad pinaagi sa pag-awhag sa mga kadagkuan ug pagsaway niadtong namunuan nga wala molihok alang sa pagsulbad sa mga krimen.

“Kinahanglan nga ang katawhan motingog na, mo-criticize, mobadlong sa mga lideres sa Ozamiz City aron molihok sila,”saysay ni Ocampos.

Iyang gipasabot nga isip kongresista aduna na siyay han-ay sa mga lakang nga himuon sa pagtabang sa siyudad nga masulbad ang nagkadaiyang krimen.

Gipasalig sa kongresista nga iyang tabangan ang Ozamiz City ilabina nga kini ang gateway sa lalawigan, gawas pa dinhio usab nahimutang ang seaport ug ang airport.

Saysay niini nga iyang dal-on usab sa atensiyon sa national government ang kahimtang sa Ozamiz gumikan kay iyang namatikdan nga daw sa walay gihimo si Police superintendent Raul Diones, Ozamiz Chief of Police ug ang Philippine National Police (PNP) provincial director Superintendent Robert Quenery.

Giprangka ni Ocampos nga mosulti na lamang sila si Diones ug Quenery nga dili nila makaya ang pagpatunhay sa peace and order sa Ozamiz aron mohimo siya og lakang nga pailisan sa ilang katungdanan.

Hinuon, giangkon ni Ocampos nga nakasabot usab siya sa kahimtang sa kapolisan sa Ozamiz nga maglisod nga makalihok sa siyudad tungod kay giingong adunay mga grupo nga naglihok ug ingon man adunay syndicated crimes nga nagakahitabo.

Gumikan usab niini nanawagan si Ocampos ngadto ni Ozamiz City Mayor Nova Princess Partojinog-Echavez nga dili pasagdan ang dakbayan.

Sumala sa kongresista nga andam siya nga mohatag og tabang sa Ozamiz ilabina sa peace and order.

Sa iyang kabahin, gipadayag ni Echavez nga welcome alang kaniya ang unsa man nga tabang ni Ocampos basta nagtumong kini alang sa kaayohan sa dakbayan.

Saysay pa sa mayor nga panahon na karon sa pagtinabangay tungod kay nahuman na ang elections.(NEPTALIE BATOLENIO)