Pagronda sa balay ni Romero, padakop ni Visitacion politika ang hinungdan?

USA ka political harassment ang nahitabo nga pag-ronda sa mga awtoridad sa panimalay ni Misamis Occidental 2nd District Board member Roland Romero niadtong Marso 27.
Sa gipahigayon nga press conference, gikondina sa grupo nila ni Liberal Party congressional candidate ug Governor Loreto Leo Ocampos ang pagronda sa Criminal Detection Group (CDIG) 10, Special Action Force (SAF) ug mga sakop sa kapolisan sa Ozamiz City.

Gipadayag ni Ocampos nga sa ilang paglantaw ang maong pagpangronda sa panimalay ni Romero naglambigit og inhustisya ug pagpang-harass tungod sa nakita nga adunay bikil ang pagpagawas sa ug pagpatuman sa search warrant.

Gidugang ni Ocampos nga siya mismo nakighinabi kang Judge Rio Achas sa MTCC Branch 2 ang nag issue sa nasangpit nga warrant nga dunay nagpa ila nga usa ka opisyal sa CIDG ang nag apply niini sa iyang buhatan apan sa dihang gisuhid nasuta nga wala mailhi ang maong tawo lakip na usab sa mga witness nga gipakita aron makombensir ang huwes.

Nasayran nga legal nga proseso ang himuon sa kampo ni Ocampos subay sa pag raid sa balay ni Romero.

Gipahayag sa Gobernador, nga kon unsa man ang ilang kwestion subay sa maong kahimoan sa mga sakop sa CIDG ug Special Action Force , kini ilang dalhon sa korte.
Iyang gidugang nga may mga depekto diha sa maong raid busa iyang gipaklaro nga gikinahanglang manubag ang si kinsa man nga responsabli niini.

Nasayran nga sa sinugdanan pa lamang, gi kwestion na sa kampo ni Ocampos pinaagi ni Atty.Conie Lim, nga depektoso ang search warrant nga gi silbi sa raiding team,. busa kini ang ilang gi- kwestion ngadto sa korte.

Gipaklaro sa Gobernador nga dili sila motumpang sa unsay mga dili maayong lihok sa ilang mga kaatbang sa politika, apan sila mohimo sa lakang nga pinasubay sa gimbut-an sa balaod.

Si Romero ang gikustudiya nila nila ni Ocampos ug Lim.

Una niini, gipadayag ni Romero,nga wala siya magtuo nga sila hasulon sa ingon niini.
Dako ang iyang pagtuo nga kining tanan usa ka lihok sa politika gumikan nga wala siya sukad makakita og away.

Gisabot ni Romero nga sukad siya mideklara nga magpapili sa pagka besi mayor sa Ozamiz, nagsugod na ang paghasol kaniya ug sa iyang pamilya.

Kahinumduman nga sa wala pa mahitabo ang pag raid sa ilang balay, gihiloan sa wala mailang mga atwo ang iyang siyam ka mga iro.

Matag gabii adunay mga namatikdan sa iyang mga sakop sa banay nga ingon sa adunay mga naniid sa ilang panimalay ug daghang hulga ang midangat sa iyang kinabuhi.

Apan kining tanan gidawat ni Romero ug wala siya motalaw sa iyang tinguha sa pag alagad sa katawhan sa Ozamiz.

Nasayran nga ang pag raid gipasayon sa CIDG ug SAF sa pagpanguna ni Police Superintendent Danilo Balmes ug Police Superintendent Juanito Indira ang Assistant regional Director for CIDG Region Ten.

Nakuha sa rading team sa panimalay ni Romero ang 76 ka mga bala sa carbine, 19 ka bala sa 9mm, 165 ka bala sa M14, pito ka magazine sa M14, usa ka carbine rifle, usa ka M16 nga napala na ang serial number, tulo ka short M16 rifle.

Samtang duha ka adlaw ang milabay human sa pagronda sa panimalay ni Romero, gidakop usab si Oscar ‘Boy’ Visitacion, tigpamaba sa kampo nila ni Ozamiz City Mayor Reynaldo Parojinog.

Gidakop si Visitasion gumikan sa tulo ka counts nga libel nga gipasaka ni Lim.
Wala makaprograma si Visitacion sa iyang binayran nga tulomanon niini niadtong Lunes sa buntag sa dxSY-AM gumikan kay gidakop kini sa 1005th Mobile group sa pagpanguna ni superintendent Edgar Daniel, group director.

Gisaysay ni Visitacion nga politika ang hinungdan nga gipasakaan siya og libel. Hinuon nakagawas ra kini human nga makapiyansa og P30,000.