Bernad miiktad sa survey

MIIKTAD si Ozamiz Vice-mayor Carlos Patricio ‘Kaloy’ Bernad, Misamis Occidental Liberal Party (LP) gubernatorial candidate sa giingong adunay nagsurvey sa una ug ikaduhang distrito diin nakabutang ang iyang ngalan nga midagan sa pagka-bise gobernador.

Sa pagpakighinabi sa dxDD-AM, gipadayag ni Bernad nga taod-taod na nga adunay nagsumbong kaniya niini apan iya lamang kini nga gibaliwala apan gumikan nga nagkadaghan na ang mitaho kaniya hinungdan nga mipagawas siya sa iyang reaksiyon.

Gisaysay ni Bernad nga dili makatarunganon ang lakang nga pagsurvey nga dili itug-an ang iyang tinuod nga posisyon nga daganan sa umaabot nga piniliay.

Hinuon walay gitumbok sa Bernad nga responsabli sa maong lakang apan dako ang posibilidad nga ang iyang mga kaatbang sa politika.

“Aw wala man ta makaseguro og kinsa ang naghimo niini, ang ako lang nga itug-an lang unta ang tinuod,” saysay ni Bernad.

Sa tulomanon nga ‘Isyu 657’ sa dxDD-AM usa ka caller ang mipadayag nga possible nga hinimuan kini sa usa sa iyang mga kaatbang sa politika o dili ba kaha ang kampo lamang ni Bernad ang mihimo aron mahimong mahisgutan sa katawhan ug sa media.

Gidugang sa pagsugilon ni Bernad nga dili mahimo nga ang iyang kampo ang mihimo niini tungod kay siya ang labing una nga mipadayag nga modagan sa pagka-gobernador gani ang ubang kandidato kaniadto wala pa makahukom sa posisyon nga ilang daganan.

Ang kaatbang ni Bernad sa pagka-gobernador sa Misamis Occidental sila si Vice-governor Francisco Paylaga, Jr., ilalom sa Nacionalista Party (NP) ug si kongresista Herminia Ramiro sa Lakas-Kampi.