Dili tinuod nga namatay si FPJ

DAKONG bakak ang migawas nga tawo nga hikabsan sa iyang kinabuhi si Misamis Occidental Vice-governor Francisco Paylaga, Jr., aka FPJ gumikan sa sakit sa kasingkasing.

Sa iyang pag-atubang sa mga sakop sa media, gipadayag ni Paylaga nga tinuod nga nailalom siya sa lima ka heart bypass apan dali ra siya nga naka-recover.
Gipadayag ni Paylaga nga tungod sa mikuyanap nga dili maayong balita pinaagi sa mga text messages gumikan sa giingon niining kamatayon nabalaka ang iyang mga supporters ug mga sakop sa banay.

Gidugang ni Paylaga nga bisan pa man sa dili maayong balita apan iya gihapon kining gikalipay kay kadtong gidungog nga namatay na motaas ang kinabuhi.

“Ang akong asawa gud migakos nako dayon tungod sa iyang kalipay nga dili tinuod ang maong taho tungod kay dako man kong buhi,”saysay ni Paylaga.

Nagpasalamat sa Diyos si Paylaga nga bisan sa lima ka heart bypass nga iyang nasinati apan nakalingkawas siya ug andam nga mopadayon sa iyang buhat isip gobernador ug kon palaran mahimong gobernador sa lalawigan.

Gisaysay ni Paylaga nga gumikan sa iyang pagka-athletic maoy gituohan nga dali ang iyang recovery.

Gitubag usab ni Paylaga ang espekulasyon nga possible nga ang iyang kampo lamang ang mipakatag sa maong taho aron mahimong mahisgutan sa katawhan isip kabahin sa kampanya sa politika.

Gisaysay niini nga sa iyang kadugay na sa panerbisyo sa gobiyerno wala gayud siya mohimo sa maong taktika. Hinuon iyang gisaysay nga kon kinsa man ang mihimo sa maong ‘tabi’ iya na silang gipasaylo.