Vice Mayor Kaloy nanawagan sa mga botante nga dili magpadala sa kuwarta.

Vice Mayor Kaloy Bernad nanawagan sa mga botante sa lalawigan nga dili magpadala sa kuwarta panahon sa eleksiyon.

Walay Paglaum nga makab-ot ang maayong Kaugmaon sa lalawigan sa Misamis Occidental kun magpadayon ang kultura sa sayop nga sistema sa politika nga mahimong dakong bahin niini ang pagpamalit og botos.

Nahimong tradisyon na sa mga trapong politiko ang pagpamalit og botos sa mga botante nga maoy hinongdan nga hinay ang pagkab-ot sa kalamboan, kausaban, gumikan kay nahimong bota o bungol ang mga namunoan, o kon adunay programa ug proyekto maningkamot nga makasapi aron makabawi sa nagasto sa eleksiyon ug andamon alang sa sunod nga piniliay.

Gipasabot ni Bernad nga kini nga eleksiyon importanti kaayo gumikan kay kini ang isipon nga dakong kahigayonan aron makapili ang gamhanang mga botante og hustong mga pangulo sa lalawigan nga maningkamot sa pagmogna og mga programa ug proyekto aron mahaw-as sa talay sa labing pobring lalawigan sa nasod ang Misamis Occidental.

Gibutyag sa besi mayor nga sukad sa iyang pagsulod sa politika ug midaog isip konsehal ug nakab-ot ang posisyon isip last termer vice mayor sa siyudad, wala gayud siya mopalit ni bisan usa ka boto sa botante.

Supak sa iyang kabubut-on, sa iyang pamilya, ilabina nga aduna silay sakop sa pamilya nga pari ug duha ka madre, busa dili gayud mahimo nga maoapil siya sa pagpamalit og botos sa mga botante.

Gituohan nga ang vote buying usa ka binhi sa korapsiyon, busa magpabilin gayud kini nga suliran samtang magpadayon usab ang suliran sa pagpamalit og botos sa mga botante. (Nanding G. Dumanhug, Office of the Vice Mayor)