200,000 pesos ganti sa makatudlo sa pari

OZAMIS City - Mipagawas og cash reward ang local nga pangamhanan sa Pagadian City ni bisan kinsa nga makahatag og kasayuran sa nahimutangan sa gikidnap nga pari.

Gipadayag ni Allan Molde, spokes person sa Zamboanga del Sur Crisis management committee nga ang City Council nakauyon nga mohatag og P200,000 sa makahatag og kasayuran sa nahimutang ni Fr. Micahel Sinnott.

Gidugang ni Molde nga si Pagadian Mayor Samuel Co nakig-alayon sa business sector aron makapagawas sa maong pundo.

Kahinumduman nga sulod na sa duha ka semana nga gidagit ang pari ug hangtud karon wala pay natumbok nga suspetsado ug wala pay nasayran ang crisis management committee sa nahimutangan sa pari.

Gipadayag ni crisis management spokesman ug Zamboanga del Sur public information office chief Allan June Molde nga nabalaka na sila sa kahimtang sa pari.

Gidugang ni Molde nga ang mga provincial officials lakip si Zamboanga del Sur Governor Aurora Cerilles nabalaka sa kahimtang sa panglawas ni Fr. Sinnott ilabina nga sa edad nga 79 aduna kini suliran sa kasingkasing.

Gisaysay ni Molde nga wala makigdugtong ang mga kidnappers sa ilang buhatan ug sa mga awtoridad.

Nasayran nga sukad nga madagit ang pari wala pa kini mahatdi og tambala alang sa maintenance sa iyang sakit sa kasingkasing. ( Neptalie A. Batolenio )