Clarin nakadawat og ambulansya gikan sa PCSO

CLARIN MisOcc. - Hingpit na nga magamit sa kagamhanang lokal sa lungsod sa Clarin ang usa ka unit nga ambulansya gikan sa Philippine Charity Sweepstakes Office kon PCSO.
Kini human gi-turnover niadtong miaging adlaw sa lungsod pinaagi sa provincial office sa Misamis Occidental.

Gipahayag ni Clarin Municipal Mayor David Navarro nga daku ang iyang pasalamat sa kagamhanang probinsyal ug PCSO nga usa ang iyang lungsod nga nakapahimulos sa charity program sa PCSO.

Ang lungsod sa Clarin dugay nang nangandoy og ambulansya aron adunay magamit nga behikulo sa higayon nga adunay emerhensya labina ang pagsalbar og kinabuhi.

Kahinumduman nga sa wala pa gi-turnover ang unit sa mga ambulansya matag municipalidad nagpadala og mga representante sa kapitolyo aron ipailom sa first aid training aron maoy regular nga motawo sa ambulansya.

Ang ambulansya bag-o, gawas nga adunay butangan sa mga tambal ug kahimanan, kompleto usab og stretcher, oxygen, fire extinguisher ug fully air conditioned nga komportable sa usa ka pasyente ug mga first aid.