OZAMIZ City - Senior Citizens dili moundang sa pagplano alang sa pagpalambo sa kaugalingong pamilya ug pagsalmot sa kalihukan sa komonidad alang sa pagpauswag sa goberno.
Kini ang mensahi ni Vice Mayor Kaloy Bernad sa iyang pakigpulong atol sa programa pahaom sa pagsaulog sa Senior Citizens Week nga gipahigayon sa Ramiro Gym kagahapon sa buntag.
Gihatagan og gimbug-aton sa besi mayor ang kasinatian ug katakus sa mga senior citizens sa pagpalambo sa ilang pamilya, katilingban ug sa goberno busa giisip nga bunga sa pagpaningkamot ang bisan unsa nga kalamposan nga atong nakab-ot.
Ang senior citizens maoy usa ka hulagway sa dugokan sa katilingban kinsa ang mga sakop niini mga retirado ug aktibong nagserbisyo sa goberno ug pribadong sector, ug mga yanong lungsoranon nga nagserbisyo usab sa komonidad sa yano apan bahandianon nga pamaagi.
Gipasabot usab sa besi mayor nga ang mga senior citizens maoy nag-umol sa kaugmaon sa nasod gumikan kay sila ang gitahasan sa balaod sa Dios ug sa yuta nga momatuto sa ilang mga anak panahon sa kabatan-on niini kinsa ang maong sector giisip nga maoy paglaum sa pagplambo sa nasod.
Iyang gipadayag nga ang kagamhang lokal sa siyudad sa pagpangulo ni Mayor Aldong Parojinog isip hepe ehekutibo ug siya isip pangulo sa sangang lehislatibo sa siyudad sa kanunay naglantaw alang sa kaayohan sa mga senior citizens ning siyudad.
Ang siyudad sa Ozamiz nagsaulog sa senior citizens week sulod sa upat ka adlaw nga nagsugod niadtong petsa dose ug matapos sa petsa kinse ning bulan sa Oktubre 2009 piinagi sa kakugi ni Konsehal Cecelia Mabanag ug sa suporta sa Mayor, Besi Mayor ug sa tanang sakop sa konseho ning siyudad, mga kadagkoan ug lumilihok sa CSWD ug sa mga kadagkoan ug mga membro sa mga kahugpungan sa senior citizens ning siyudad. (Nanding G. Dumanjug, Office of the Vice Mayor)
No comments:
Post a Comment