Price monitoring gipalagsik sa tibuok MisOc

GIPALAGSIK sa tibuok probinsiya sa Misamis Occidentalang price monitoring atol sa paghapak sa kalamidad sa nasud.

Kini ang nakuhang kasayuran gikan kang DTI Provincial Director Delia Ayano.

Gipahayag ni Ayano nga bisan niadto pang Septiembre 30 gipalihok na sa buhatan ang iyang mga tawo aron imonitor ang presyo sa mga basic commodities.

Nasayran nga niadto lamang Oktobre dos nadawat sa DTI Provincial Office ang deriktiba gikan sa kaulohan kalabot sa pagpatuman sa Price Control Act nga nagmando nga i-monitor ang mga batakang palaliton kansang presyo gikontrola sa gobyerno human gideklara ang tibuok nasud ilawom sa State of Calamity.

Migawas sa ilang gilusad nga price monitoring nga way bisan usa ka tindahan ilabina ang mga dagkong establisemento nga nagpataas sa presyo sa ilang mga baligya dinhi sa Misamis Occidental.

Wa usay silay nadawat nga reklamo gikan sa mga konsumante nga may mga negosyante sa probinsya nga misakay sa panahon.

Apan bisan pa niini, giawhag pa gihapon sa DTI ang publiko nga itaho sa ilang buhatan kon may mamatikdang mga negosyante nga nag- overpricing sa ilang mga produkto.

Gipasabot niini nga kon adunay increase nga dies porsento ang presyo sa usa ka produkto mahimong tugutan pa kini sa DTI apan kon mosubra na gami sa 10% ang increase makasuhan na sila ug profiteering.

Gipahayag ni Director Ayano nga padayon gihapon silang molusad og price monitoring hangtud nga dili pa tangtangon ang gideklarang State of Calamity sa tibuok Pilipinas. ( Romericko N. Gregorio )