PSTA sa MisOc mopailawom og computer operations training alang sa 2010 Election

ANDAM ang mga sakop sa Public School Teachers Association (PSTA)sa lalawigan sa Misamis Occidental nga mopailawom sa training sa computer operations agig pagpangandam sa nagsingabot nga elections sa tuig dos mil dies.

Gipahayag ni Estella Guanseng, Staff assistant sa buhatan sa Public School Teachers Association nga nakabasi mismo sa DepEd Provincial Office sa Oroquieta City, nga angay gayud nga mopailawom ang mga magtutudlo nga moserbisyo sa panahon sa eleksiyon gumikan kay kini ang labing unang higayon nga mopahigayon ang nasud ug automated elections.

Giangkon ni Guanseng nga may mga magtutudlo ilabina kadtong mga edaran na ug kadtong nadestino sa bukid nga kuwang sa kahibawo kon unsaon sa pagamit ang computer.

Gidugang pa ni Guanseng nga hangtud niining panahuna wala pa silay nadawat nga komyunikasyon gikan sa Commission on Elections kalabot sa nasangpit nga training.

Angayang masayran nga ang training sa computer operation maoy nomero sa pito ka mga condition sa giladlad sa mga magtutudlo nga sakop sa Teachers Dignity Coalition nga ilang gipangayo sa Comelec. (Romericko N. Gregorio)