Prisyo sa mga produktong petrolyo sa MisOc gireklamo

GIREKLAMO sa mga konsumanti og sa mga motorista ang presyo sa mga produktong petrolyo sa Misamis Occidental .

Gipahayag ni DTI Provincial Director Delia Ayano nga nakadawat og reklamo ang ilang buhatan kalabot sa giingong lahi ang prisyo sa lalawigan sa Misamis Occidental kompara sa prisyo sa mga produktong petrolyo nga gibaligya sa Dipolog o sa ubang dapit dinhi sa Mindanao.

Gipasabot ni Director Ayano nga sa ilang gihimong pag-monitor deperensya lamang ug dyutay ang prisyo gumikan sa katarungan nga ang produktong petrolyo dili deriktang gi- deliver sa mga gas station gumikan kay miagi pa kini ug mga depots og gikan sa mga depots ngadto na sa pumps o pumping stations ayha i-deliver sa mga gasolinahan sa probinsya.

Nakadugang pa sa pagtaas sa prisyo mao ang galastuhan sa pagbeyahe sa mga produktong petrolyo dinhi sa probinsya.

Apan bisan pa niini, padayon gihapong gimonitor sa DTI ang mga gasolinahan sa tibuok Misamis Occidental bisan kon wala na moepekto price freeze aron maprotektahan gihapona ang publiko batok sa dili makatarungnong prisyo sa lana. (Romericko N. Gregorio))