HARD Core sa Liberal Political Party sa Misamis Occidental mipalig-on sa upat ka basihanan kun criteria sa pagdawat og kandidato alang sa kompleto nga han-ay niini ning lalawigan.
Sa gipahigayon nga unang panagtigom sa lima ka tawo nga membro sa hard core nga kasamtangan nga dili una ikabutyag ngadto sa publiko ang mga bansagon niini gikauyonan nga ang unang basihanan mao ang pagkamahadlokon sa Dios sa usa ka kandidato, ikaduha ang kwalipikasyon, bukas og panghunahuna kun liberal minded ug makapadayag og mga idiya alang sa kaayohan sa katawhan.
Subay sa maong basihanan aduna nay pasiunang gikonsedera nga napulog usa ka mga kandidato sa pagkakonsehal ning siyudad nga gilangkoban sa mga abogado, mga doctor, representanti sa nagkalain laing sector,sector sa panguma, negosyante public servants ug social sector, lima ka mga board members sa ikaduhang distrito sa Misamis Occidental ug kapid-an ka mga kandidato alang sa lima board member sa unang distrito sa lalawigan ingon man mga potential candidates sa dakbayan sa Tangub, Oroquieta ug sa napulog upat ka mga munisipalidad.
Kini nga lakang maoy dason sa paghatag og tahas ni Vice Mayor Kaloy Bernad nga moorganisa sa kompletong line-up sa mga kandidato sa Liberal Party sa tibuok Misamis Occidental.
Kahinumdoman nga niadtong adlawng Sabado, nakigkita sa kampo ni Vice Mayor Kaloy Bernad Si Engineer Jojo Jardine, ang political officer for region 10 ni Senator Noynoy Aquino ug senador Mar Roxas aron iplastar ang pagpangandam alang sa pag organisa sa Liberal Party sa MisOC ug ang pagpasiugda sa Senator Noynoy Aquino Movement for President.
Sa kabahin ni Vice Mayor Kaloy Bernad gidawat niini ang tahas sa pag organisa sa partido sa tibuok lalawigan ug gikatakda nga manumpa sa partido paghidangat unya niini gikan sa usa ka bakasyon uban ang pamilya.
Una nang gipahayag sa besi mayor nga dako ang posibilidad nga modagan siya sa pagkagobernador subay niining bag-ong kamboan sa kahimtang sa politika sa lalawigan.(Nanding G. Dumanjug,Office of the Vice Mayor)
Wala kaha magkakontra kining duha ka kriterya: mahadlokon sa Dios ug liberal minded? Ang atong Simbahan miingon nga imoral ang paggamit sa mga kontraseptibo samtang ang mga liberal minded sa kalibotan wala mouyon niini. Buot ba sabton nga kadtong mga katolikong politiko nga misuporta sa Reproductive Health Bill maoy mga maayong lider?
ReplyDelete