Online news maintained by Arn Antonette D. Carollo. We will publish your news for free just email it to misoccnews@gmail.com Call or Text +63908 - 206 - 0158               +63908 - 206 - 0158                    +63908 - 206 - 0158      

Thursday, November 12, 2009

Ozamiz kusganong nagsupak sa HB 24

OZAMIZ CITY: Kusganong misupak sa House Bill 24 ug nanawagan sa dinaliang pagbasura niini.

Kini lig-ong gipadayag pinaagi sa giuyonan nga SP Resolution No. 272-09 nga hiniusang giduso sa mga sakop sa konseho niadtong Oktubre 19 ug giaprobahan ni City Mayor Aldong Parojinog, Vice Mayor Kaloy Bernad.

Sa dokomento nga gipamatud-an ni Atty. Ronnie Tapayan, secretary to the Sangguniang kusgnong gipasabot niini nga ang HB24 supak sa equal protection clause sa batakang balaod ug sa Ruling sa Supreme Court.

Ang HB 24 nagtumong nga himuong siyudad ang katloan ka mga lungsod nga giisip nga capital town sa mga probinsiya nga walay dakbayan bisan pa nga dili makatuman sa bag-ong financial requirement nga mokabat sa usa ka gatos ka milyon ka pesos aron mamahimo kining hingpit nga siyudad.

Samtang sa hukom sa kurte suprima sa kaso LCP VS. COMELEC gibarugan sa labing taas nga hukmanan nga ang tumong sa section 10, article X sa batakang balaod mao ang pagsiguro nga ang pagmogna og mga dakbayan ug uban pang local government units kinahanglan nga patas nga motuman, walay pagpihig nga mga basihanan nga nakasukad lamang sa Local Government Code.

Gidogang sa pagpasabot nga walay egong kalainan nga mahimong bug-at nga rason nga dili musunod sa sukaranan ang mga capital towm sa mga probinsiya nga walay siyudad nga dili musunod sa lagda sa pagkahimog siyudad.

Angayang masayran nga ang pagkahimog siyudad sa nahisgutang 30 ka mga munisipalidad magdulot og pagkunhod sa pahat sa Internal Revenue Allotment sa mga kasamtangang siyudad sa tibuok nasod nga gikadahadlokan nga makaapekto sa pagpatuman sa mga programa ug proyekto ug ang paghatod ug batakang sebisyo ngadto sa katawhan diin kabahin niini ang paghatag og hustong suhulan sa mga kawani sa local nga kagamhanan subay sa gingbut-an sa balaod. ( Nanding Dumanjug, Office of the Vice Mayor)

1 comment:

  1. Ang syudad nga dili makapadagan sa iyang makinarya kon walay internal revenue allotment dili tinuod nga syudad.

    ReplyDelete